Мұқышева Раушангүл Зақанқызы

Мұқышева Раушангүл Зақанқызы, филология ғылымдарының кандидаты, Сәрсен Аманжолов атындағы Шығыс Қазақстан университеті қазақ, орыс филологиясы және

журналистика кафедрасының сеньор лекторы, Төлеген Айбергенов атындағы сыйлықтың иегері, ақын, аудармашы. 

Р. З. Мұқышева 1988 жылы Өскемен педагогикалық институтының қазақ тілі мен әдебиеті бөліміне оқуға түсіп, Шығыс Қазақстан Мемлекеттік университетін 1993 жылы орыс

мектептеріндегі қазақ тілі мен әдебиетінің мұғалімі мамандығы бойынша үздік дипломмен бітірді. 1993-1997 жылдары Шығыс Қазақстан Мемлекеттік университетінің қазақ әдебиеті кафедрасында аға оқытушы болып жұмыс істеді. 1997 жылы М. О. Әуезов атындағы Әдебиет және өнер институтының Әдебиет теориясы және әдебиеттану методологиясы бөлімінде аспирантураға түсті. 1998 жылы Шығыс Қазақстан Мемлекеттік университеті қазақ әдебиеті кафедрасынан Сегед университетінің (Мажарстан) Алтаистика кафедрасына қазақ тілі лекторы ретінде жіберілді. 1998 жылы «Жалын» журналында жарияланған өлеңдер топтамасы үшін Төлеген Айбергенов

атындағы сыйлыққа ие болды. 2000 жылы М. О. Әуезов атындағы Әдебиет және өнер институтында «Қазіргі қазақ поэзиясындағы ұлттық характердің бейнелену жүйесі» атты кандидаттық диссертациясын қорғап шықты. 1998-2021 жылдар аралығында Сегед университетінің (Мажарстан) Алтаистика кафедрасында қазақ тілі лекторы қызметін атқарды. Сол кафедрада шетелдік студенттерге қазақ тілі, қазақ әдебиеті, елтану, аударма және Орта Азия халықтарының мәдениет тарихы, қарақалпақ тілі секілді пәндерден дәріс оқыды. 1999-2005 жж. аралығында «Қазақ әдебиеті» газетінің, ал 2007-2014 жж. аралығында «Айқын» газетінің Мажарстандағы меншікті тілшісі болды.

2021 жылдан қазіргі дейін Сәрсен Аманжолов атындағы Шығыс Қазақстан университетінің қазақ, орыс филологиясы және журналистика кафедрасының сеньор лекторы. Мажарстан, Польша, Англия, Түркия, Ресей, Болгария секілді елдерде халықаралық конференцияларда баяндама жасап, ғылыми мақалалар жариялады. Хаджеттепе университетінде (Түркия, 2010) Мажарстан қыпшақтары фольклоры туралы, Майнцтағы Иоганн Гутенберг университетінің (Германия, 2018) Түркітану кафедрасында қазақ тілінен, Познандағы Адам Мицкевичуниверситетінде (Польша, 2021), Клуж Напока техникалық университетінің Гуманитарлық факультетінде (Бая Маре-Румыния) қазақ әдебиетінен дәрістер оқыды.

Мұқышева Р. З. ‒ бір монография, бірнеше оқу-әдістемелік құралдың және 30-дан астам ғылымимақаланың авторы. Халықаралық ТҮРКСОЙ ұйымы тағайындаған «Абай» медалінің иегері. Бұған дейін жарық көрген аударма жинақтары:

1. «Хан және уәзір» (Биачи Моникамен бірлесіп) қазақ халық ертегілерінің мажар тіліндегі аудармалары. Сегед, 2011

2.Мажар халқының аңыздары мен ертегілері. Мажар тілінен аударылған. Астана. Ғылым баспасы. 2015.